1 Corinthians 4
1 你等應該看𠊎等做基督个僕人，係上帝个奧妙个管家。
2 主人對管家所要求个，就係佢个忠心。
3 你等抑係麼人論斷𠊎，𠊎全部看做小事情；事實上，𠊎自家也毋論斷自家。
4 𠊎自家感覺良心清白，總係做毋得因為恁樣證明𠊎無罪。主正有權論斷𠊎。
5 所以，時間吂到，你等毋好論斷；等到主再來，會有最後个審判。該時，佢愛將囥在烏暗中个祕密掀開來，將人心中个動機挖出來。該時，每一個人會對上帝得到應得个稱讚。
6 兄弟姊妹啊，為你等个緣故，𠊎用亞波羅㧯𠊎自家做例仔來講起這兜事情，係愛你等對𠊎等來學「毋好超過聖經所記个」這句話个意思；免得你等自高，看重這個，看輕該個。
7 麼人使你贏過別人呢？你所有个，敢毋係上帝賜个嗎？既然係上帝賜个，你做麼介還誇口，像係你所有个毋係上帝賜个呢？
8 你等已經樣樣有了！你等已經富足了！你等毋搭𠊎等，自立做王！好啊！𠊎真希望你等正經做王，俾𠊎等也同你等共下做王！
9 因為，照𠊎看，上帝明明將𠊎這兜做使徒个列在背尾，像係判死刑个犯人，在天地間成做一齣戲，俾天使㧯世間人看。
10 為到基督个緣故，𠊎等成做戇仔，總係你等在基督个底背做聰明人噢！𠊎等軟弱，總係你等堅強噢！𠊎等被人看輕，總係你等受尊重噢！
11 直到這下，𠊎等常常肚飢，嘴燥，無衫好著，又被人打，四處漂流，
12 還愛辛辛苦苦親手做事來塞肚笥。被人罵，𠊎等就祝福；被人壓迫，𠊎等就忍耐；
13 被人侮辱，𠊎等就好嘴回答。到這下，𠊎等還被人看做地面上个垃圾，世間个廢物。
14 𠊎寫這兜，毋係愛喊你等見笑，係愛勸話你等，像勸𠊎所惜个子女一樣。
15 在基督徒个人生中，你等可能會有歸萬个導師，總係只有𠊎一儕係你等个阿爸；因為係𠊎傳福音給你等，𠊎在基督耶穌个底背就成做你等个阿爸。
16 所以，𠊎勸你等愛學𠊎个榜樣。
17 因為恁樣，𠊎派提摩太去你等該位；在主底背佢係𠊎親愛又忠心个孻仔。佢會對你等講起𠊎信基督耶穌以後个所行所做，就係𠊎在逐位各教會所教个。
18 你等當中，有兜人想𠊎無可能去你等該位了，就自高自大。
19 其實，主若係肯，毋使幾久𠊎就會去看你等。該時，𠊎毋單淨愛聽該兜驕傲个人所講个，也愛看佢等到底有麼介權能。
20 因為上帝个國毋係在乎言語，係在乎權能。
21 你等愛麼介？愛𠊎帶等棍仔去，抑係愛𠊎帶慈愛溫柔个心去啊？